काठमाडौँ । सरकारले बागमती लगायतका उपत्यकाका नदीहरू सफाइका लागि नयाँ रणनीति बनाइरहेको जनाएको छ । 

राष्ट्रियसभाको सार्वजनिक नीति तथा प्रत्यायोजित विधायन समितिको आजको बैठकमा उपप्रधान एवम् शहरी विकासमन्त्री प्रकाशमान सिंहले उपत्यकाका बागमतीलगायतका नदी सफाइका लागि ठूलो बजेट खर्च हुँदा पनि कुनै नतिजा नदेखिएकाले विशेष योजनाका साथ सरकार अघि बढ्न लागेको जानकारी दिनुभयो । 

बैठकमा सांसदहरुले विकासका पूर्वाधार निर्माण गरिँदा बाढी पहिरोजस्ता प्रकोपहरू बढेर ठूलो जनधनको क्षति हुने गरेकाले सरकारले त्यस्ता पूर्वाधार  बनाउँदा भौगोलिक अवस्थाको मापन गरिनुपर्नेमा जोड दिनुभयो । 

सांसदहरुले पहाडी इलाकाहरू आफैमा भ्यूटावर भएकाले भ्यूटावर बनाउन खर्चिने बजेट सहरको सरसफाइमा खर्चिनुपर्ने, काठमाडौँको फोहोर व्यवस्थापनको दीर्घकालीन समाधान खोजिनुपर्ने र सिंहदरबारमा निर्माणाधीन संसद् भवन यसै आर्थिक वर्षभित्र सकिनुपर्नेमा जोड दिनुभयो । 

बैठकमा मन्त्रालयका निमित्त सचिव पदमकुमार मैनालीले नीति तथा कार्यक्रमले तयार गरेका निर्माणका योजनाहरू मन्त्रालयले तदारुकताका साथ कार्यान्वयन गरिरहेको बताउनुभयो ।